Siskiyaan...

Mujhse poochte ho main kaun hoon..
Meri aahat ab ek sawaal hai tumhaare liye.
Kehte ho yaad nahi kuch..
Anjaan mere khayaal hai tumhare liye.

Roshni se roothe baithe ho..
Kehte ho andheron ne gher rakha hai.
Ajnabiyon se dosti hain tumhari..
Apno se mooh mod rakha hai.

Agar kaho toh saath chal sakti hoon..
Na kehne par bhi mujhe aana hai.
Kehte ho iski zaroorat nahi..
Tanhaaiyon se tumhaara yeh ajeeb yaraana hai.

Khwaab ek nahi humaare..
Raahoin ko bhi bat jaana hai.
Ajeeb hai meri yeh uljhan..
Haath phir bhi maine tumhaara hi thaama hai.

Jo toot gayi agar main..
Samet paaoge apne aap ko.
Jo aawaz meri tum tak na pauhunchi..
Samjha paaoge apne aap ko.

Kaisa asar hai tumhaara yeh..
Sawaal karna mujhe bhi seekha diya.
Jawaab na dhoond saki toh..
Sawaalon se hi man behla liya.

Yaadoin ko kuretna..
Aadat nahi humaari.
Masoom khwaahishon ko kuchalna..
Fitrat nahi humaari.

Diwaangi ki bhi had dekho..
Jo maanga, maine diya.
Toh kya hua agar..
Apne aapko hi mujhse cheen liya.