Shayad...

Mausam badal raha hai. Shayad kuch aur bhi. Shayad main. Shayad tum.

Yun meri taraf dekh tumhaare muskuraane ka kya matlab nikaloon main...Is ehsaas ka koi toh naam hoga. Shayad tumhe pata ho. Shayad mujhe bhi. Par haan tumhi kehte ho...shabdoin ke pare dekho...dekh rahi hoon...

Khoobsurat hai. Is safar ki taraf...

Chalte chalte...kadmoin ki aahat sun rahe ho...jaise kuch keh rahein ho...shayad gunguna rahein hain...
Shayad...

Dekhona ab is gudgudi ka main kya karoon...
Pareshaan hoon...ise kaho mujhe tang na kare...

In sitaaroin se poocho agar yeh kal bhi hum par yunhi meherbaan rahenge...
Kal bhi hume dekh muskuraayenge...

Ab na kehna tanha ho...
Mere saath ho. Mere paas.

Labzoin mein kya rakha hai...
Jab bin kahein itni baatein ho...
Bin bataye ehsaas ho...

Agar kaho toh is hawa ke jhonke ko chale jaane ko keh sakti hoon...
Kahin humaare waqt ko uda na le jaaye...

Na jaane ab yehaan se kahaan jaana hai...
Kitne kareeb aana hai...
Kitni door jaana hai...

Bas tum saath ho...
Aur yeh ehsaas hai...

Ki...

Shayad...
Shayad ise hi pyaar kehte hain...