Kal raat bahut der talak main jagti rahi.
Tumhaari jo itni saari tasveerein hain paas mere, na jaane kitni baar unhe dekhti rahi. Kuch tirche kuch dhumil, kuch naye aur kuch puraane.
Tasveeroin mein samaaye na jaane kitne lamhe. Na jaane kitna waqt aur na jaane kitne tum aur kitne hum. Lamhoin mein behti kuch kahaaniyaan, tasveeroin mein kaid kuch yaadein aur un thehre hue paloin mein badalte tum aur badalte hum.
Maano ek arsaa beet gaya ho - tab mein aur aaj mein. Maano kal ki hi baat ho. Ya na maano toh jaise aisi hi rahi ho puri zindagi humaari.
Main keh rahi hoon tumse, main der tak in tasveeroin ko haath mein liye inhe takti rahi. Na jaane kab haath se tasveer chooti aur na jaane kab aankh lag gayi.
Par...
Kal raat bahut der talak main jagti rahi.
No comments:
Post a Comment